عزل الرطوبة
" طرق العزل – المواد المستخدمة
– فنيات العزل "
عادة ما نحتاج لعزل الرطوبة فى الحمامات والمطابخ وفى بعض الاحيان فى
الاسطح لذلك اليكم ملخص لبند عزل الرطوبة فى دورة
التشطيبات للمهندس حديث التخرج .
1- صنايعى العزل بيدخل بعد التكسير ( الى السباك كسره ) وقبل لما السباك
يشتغل ويركب المواسير.
2- نوع العزل الاشهر فى مصر هو استخدام بتومين على البارد
نشترى البتومين على البارد وبيجى على هيئة باستلات او براميل على حسب
الكمية المطلوبة .
البتومين على البارد ليه انواع كتير ومعظمها كويس زى سيروبلاست- CEROPLAST ولما بفتح البستله بيكون فيها
مادة سائلة لزجة بارده يعنى مش هتتسخن .
وهنا واحنا بندهن هيظهر معانا حاجة اسمها ( الحرامية ) وهى عبارة عن فراغات مش مدهونة كويس وظهورها يعد
من عيوب العزل لذلك هنراجع على دهان السطح كويس .
تانى مصطلح معانا هنا ( رقبة الازازة ) وده بنعمله عند اماكن التقاء
الارضية الخرسانية مع الحائط او العمود لان المكان ده بيكون صعب العزل عشان
الزاوية بتكون قائمة بين الارضية والحائط لذلك نقوم بتحضير مونة اسمنتية ونضعها فى
تلك الزاوية ونجعلها تصنع زاوية مائلة بين الارضية والحائط لنضمن العزل الجيد.
قبل ما ادهن مادة العزل لازم السطح يكون نظيف ومستوى عشان اتفادى ظهور
الحرامية فى العزل لذلك لو السطح مش مستوى هنعمل التسوية باستخدام مونة اسمنتية
ومننساش رقبة الازازة
فى اول وش من مادة العزل بنخفف مادة العزل باستخدام الماء وبنسبة معينه
بتكون مدونة على البستله والتخفيف ده عشان ماده العزل تفرد كويس على السطح.
بعد كده ابدأ ادهن السطح ( الارضية + اول 20 سم من الحائط ) بالماده
العازلة فى اتجاه واحد واسيب الدهان يجف فى مدة من 4 الى 6 ساعات ، وبعد لما يجف
ادهن الوش التانى من مادة العزل بدون تخفيف ( بدون اضافة المياة ) وفى اتجاة معين
واتركه ليجف ثم بعد ذلك الوش الثالث للعزل وايضا بدون تخفيف ويكون فى اتجاه عمودى
على اتجاه الوش الثانى حتى نضمن العزل الجيد.
كده العزل تم ؟!
لازم اعمل اختبار العزل وهو عبارة عن ملئ المكان بالماء وتحديد منسوب الماء
فيه ونترك الماء بالمكان لمده يوم ثم نقيس منسوب الماء فى اليوم التالى واذا وجد
فرق كبير فى المنسوب هذا يعنى ان فى تسرب وان العزل مش كويس ولابد من مراجعة العزل
مره اخرى. ( فرق المنسوب المقبول هو اقل من .5 سم " تبخر وليس تسرب " ) .
3- ويفضل استخدام لفائف البتومين على البتومين السائل لانه يكون على هيئة لفائف
جاهزة للفرد مباشرة ولا يجهد عامل العزل.
لفائف البتومين موجوده على هيئة لفائف بعرض 1 متر وبطول 10 متر وبسمك مختلف
لكن ليس معنى ذلك انها بتفرد 10 متر مسطح وذلك لوجود مسافة تراكب بين كل لفتين
متجاورين ( overlap ) بيكون على الاقل 10 سم او حسب المواصفات لذلك ممكن تفرد من 8 الى 9
متر مسطح .
فى شركات كتير بتنتج النوع ده زى شركة بتومين ، انسومات ، انسوتيك ،
كيماويات البناء الحديث وغيرها.
الخطوة الاولى هنا برده تسوية السطح جيدا وعمل رقية الازازة .
فى البداية هنا برده بنعزل بطبقة عزل بتومين على البارد مخفف ونتركها تجف
ثم بعد ذلك يقوم العامل باخذ المقاسات على ابوه يعنى بيفرد اللفة على السطح ويقص
الزياده وطبعا بيعمل حساب مسافة التراكب المحددة و 20 سم راسيا على كل حائط.
يأتى بعد ذلك تثبيت هذه الالواح على السطح باستخدام "البشبولى"
وهو عبارة عن خرطوم متصل من جهة بانبوبة غاز ومن الجه الاخرى بفتحة بيخرج منها نار.
يقوم العامل بتوجيه اللهب على الفائف من ناحية الوجة المقابل للسطح المعزول
وايضا الجزء المقابل من السطح والمدهون بطبقة بتومين على البارد ( بيسخن الوجهين
الى هيحصل بينهم لصق ).
ونركز فى اماكن الضعف ( الاركان + اماكن التراكب ) حيث يقوم العامل بكوى
اماكن التراكب باستخدام البشبولى و مسترين " ضفرة " اما بالنسبة للاركان
ممكن العامل يقوم بكوى الاركان ولكنها طريقة مش فعاله وخاصة لو مش هتشطب بسرعة اما
الطريقة الاكثر فاعلية والمضمونة هى ان العامل يقوم بدفن طرف لفة العزل من اعلى فى
الحائط عن طريق تكسير 4 سم فى الحائط وعلى
ارتفاع الـ 20 سم الى هيتم عزلهم من الحائط ويقوم بدفن طرف لفة العزل بداخل الحائط
و يقوم بتثبيتها بمونة .
بعد الانتهاء من العزل نقوم بوضع طبقة حماية من المونة الاسمنتية ولا يفضل
وضع رمل بدلا من المونة .
4- اما بالنسبة للعزل باستخدام مواد كيميائية فهو المستخدم فى بعض الاحيان
وخاصة اذا كان السطح المطلوب عزله سطح راسى مثل حمامات السباحة .
لان العزل باستخدام لفائف البتومين او البتومين السائل يكون سطح ناعم يصعب ربطه
مع المحارة او السراميك بخلاف المواد الكيميائية لانها اشبه بالمادة الاسمنتية.
وتتميز شركة سيكا فى هذا النوع وخاصة منتج " سيكا توب سيل 107 " وهو
عبارة عن شكائر ومعها سائل خاص حيث نقوم بخلط المادة مع هذا السائل لنكون المادة
العازلة ونقوم بفردها على السطح المطلوب عزله ثلاث وشوش متعامدة مع مراعاة ان يكون
السطح مستوى ونعمل رقبة ازازة وطبعا نترك المادة العازلة تجف بعد كل وجة ولا نقوم
بتخفيف اى من الطبقات الا اذا نصت المواصفات على ذلك .
فضلا وليس امرا شارك المقال مع اصدقاءك لتعم الفائدة
لا تنسونا من صالح دعاءكم
لا تنسونا من صالح دعاءكم
